أطلق الشاعر والملحن اللبناني فارس اسكندر صرخته ضدّ الأزمة الكبيرة التي يواجهها لبنان على الأصعدة كافة، ونشر فيديو عبر حسابه الخاص على أحد مواقع التواصل الإجتماعي، تحدث فيه عن وجع أغلب اللبنانيين اليوم، الذين يعانون من غلاء المعيشة وانقطاع الأدوية في الصيدليات وغيرهما من الأزمات، برسالة تحت عنوان "أكل الهوى".
وكتب فارس اسكندر في رسالته:
"يا ريت بيحطّوا ضريبة عالهوى
بيغلى وبِسعر النفَـس كلنا ننكوى
وبيرفعوا عنو الدعم متل الطحين
حتى نبطّل مع بعض أكل الهوى
صح سرقونا الزعما الحاكمين
بس نحنا الشعب نفس المستوى
نحنا الفساد بدمنا ومأدمنين
حانضل ننهش بعضنا ما في نوى
من كم سنة بذكر غضب المزارعين
وكَـب الثمر بالأرض بعد الإستوا
بحجة الإستيراد كانوا خسرانين
هلق سعر محصولهن نار وكَـوى
وبشوف تجار النفط والبنزين
يللي طمعهن والجشع ما بيرتوى
من قبل رفع الدعم هني مسكّرين
ونبريشهن عالأرض دغري بينطوى
وتجار سوبرماركت الما إلن دين
علب الحليب عا ولادنا بيخبوّى
بيوطا الدولار هني بيضلّوا محلّـقين
خنازير مدعومين من كل القِـوى
مش رايحة الا عاناس معترين
اللي بيركضوا عالسلع حتى يغلّوّى
وتهريب ماشي وللأسف المهربين
لَـبلاد تاني كرامتهن باعوّى
وكل هيدا وبعدنا متحمّلين
ومنقول نحنا بالهوى كلنا سوا
بس توصل لَـلدوا يا كافرين؟
قديش انتو بِـسرقتنا مخصصين
وشركا مع الحكّام عشرات السنين؟
رح يجي يوم بإذن رب العالمين
إبَـنك وإبنو يمرضوا قدامكن
تبيعوا كلاويكن ما تلاقولن دوا ...".
